കുട്ടികള് നടത്തിയ ലൈബ്രറി വാര്ഷികം
അവര്ക്കൊപ്പം ബാലാവകാശ കമ്മീഷന് ചെയര്മാനും
വളപട്ടണം ഗ്രാമപഞ്ചായത്ത് ലൈബ്രറിയുടെ എഴുപത്തിരണ്ടാമത് വാര്ഷിക പരിപാടികള് ആസൂത്രണം ചെയ്ത് നടത്തിയത് കുട്ടികളാണ്. മറ്റാരേക്കാളും നന്നായി അവരത് ചെയ്തു. കേരള ബാലാവകാശ കമ്മീഷന് ചെയര്മാന് അഡ്വ. കെ.വി മനോജ് ആയിരുന്നു ഉദ്ഘാടകനായെത്തിയത്. ചെയര്മാന് മുമ്പില് കുട്ടികളുടെ കമ്മിറ്റി തയ്യാറാക്കിയ എട്ട് നിര്ദ്ദേശങ്ങളടങ്ങിയ അവകാശ രേഖ അവതരിപ്പിച്ചത് അജ്ന പര്വ്വീണ്. കുട്ടികളുടെ നിര്ദ്ദേശങ്ങളോട് പ്രതികരിച്ച് സംസാരിച്ചുകൊണ്ടാണ് അഡ്വ. കെ.വി മനോജ്കുമാര് സംഗമത്തിന്റെ ഉദ്ഘാടനം നിര്വ്വഹിച്ചത്. കുട്ടികള്ക്ക് പ്രായത്തിനനുസരിച്ച് ലഭിക്കേണ്ട ലൈംഗിക വിദ്യാഭ്യാസം മുതല് വളപട്ടണത്തെ കുട്ടികളുടെ പാര്ക്ക് ഗ്രാമപഞ്ചായത്തിന് കൈമാറണം എന്ന ആവശ്യം വരെ അവകാശ രേഖയില് ഉണ്ടായിരുന്നു. കുട്ടികളുടെ പാര്ക്ക് സംബന്ധിച്ച് അടിയന്തിരമായി ഇടപെടുമെന്ന് അദ്ദേഹം മറുപടി പ്രസംഗത്തില് ഉറപ്പ് നല്കി. നിറഞ്ഞ കൈയ്യടിയോടെയാണ് സദസ്സ് ആ വാക്കുകളെ ഏറ്റെടുത്തത്.
കുട്ടികളുടെ ഇടയിലേക്കിറങ്ങി ചോദ്യം ചോദിച്ചും അവരെ പ്രോത്സാഹിപ്പിച്ചും ഒരു മണിക്കൂറോളം നേരം ബാലാവകാശങ്ങളേപ്പറ്റി ആ സംഭാഷണം നീണ്ടു. വില്ലേജ് ചെല്ഡ് പ്രൊട്ടക്ഷന് കമ്മിറ്റിയിലെ കുട്ടികളുടെ പ്രതിനിധി കൂടിയായ എ.കെ സല്മയാണ് അധ്യക്ഷത വഹിച്ചത്. കുട്ടികളെ ഗൈഡ് ചെയ്യാന് രക്ഷിതാക്കളും സമൂഹവും പലപ്പോഴും പരാജയപ്പെട്ട് പോവുന്നതിനേപ്പറ്റി സല്മ പറഞ്ഞു. ലൈബ്രറിയുടെ വാര്ഷിക റിപ്പോര്ട്ടവതരണം നടത്തിയത് ലൈബ്രറി ബാലവേദിയിലെ ആറാം ക്ലാസ്സുകാരായ ഇലാന് ഫൈറസും ആര് ശിവദയും ചേര്ന്നാണ്. സ്ക്രീനിലപ്പോള് മറ്റൊരു ആറാം ക്ലാസ്സുകാരനായ അമന് തയ്യാറാക്കിയ ലൈബ്രറിയേപ്പറ്റിയുള്ള വീഡിയോ ചലിച്ചുകൊണ്ടിരുന്നു. ലൈബ്രറി സൌഹൃദ പുരസ്കാര പ്രഖ്യാപനം നടത്തിയത് എം.ടി ശ്രീലക്ഷ്മിയാണ്.
2022ലെ ഏറ്റവും മികച്ച ലൈബ്രറി സൌഹൃദ കുടംബത്തിനുള്ള കര്മ യു.എ.ഇ വളപട്ടണത്തിന്റെ പുരസ്കാരത്തിന് കുഞ്ഞാമിന മഹലിനെയാണ് തെരഞ്ഞെടുത്തത്. ഇലാന്റെയും സല്ഫയുടെയും അന്സാരി മാഷിന്റെയും ഒക്കെ വീട്. ലൈബ്രറിയിലെ മികച്ച വായനക്കാര്. ഗ്രാമപഞ്ചായത്ത് പ്രസിഡന്റ് പി.പി ഷമീമ, വൈസ് പ്രസിഡന്റ് വി.കെ.സി ജംഷീറ, സ്ഥിരം സമിതി അധ്യക്ഷരായ എ.ടി മുഹമ്മദ് ശഹീര്, എ.ടി സമീറ എന്നിവരൊക്കെ കുട്ടികളോട് പ്രതികരിച്ച് സംസാരിച്ചു. പുതിയ ആശയങ്ങളും ചിന്തകളും പ്രവര്ത്തനങ്ങളും അംഗീകരിക്കപ്പെട്ടു. കുട്ടികളുടെ നിര്ദ്ദേശങ്ങള്ക്ക് ഗ്രാമപഞ്ചായത്ത് തീര്ച്ചയായും പരിഗണന നല്കും എന്ന പ്രസിഡന്റ് പി.പി ഷമീമയുടെ വാക്കുകള് സന്തോഷം പകര്ന്നു. കുട്ടികളവതരിപ്പിച്ച കലാപരിപാടികളുണ്ടായിരുന്നു. ബാല വേദി കമ്മിറ്റി അംഗം സല്ഫ പി.എം സ്വാഗതവും പി മുഹമ്മദ് വലീദ് നന്ദിയും പറഞ്ഞു.
ബാലസൌഹൃദമായ ഗ്രാമം എന്ന സങ്കല്പ്പത്തിലേക്കുള്ള യാത്രയിലാണ് വളപട്ടണം. ലഹരിയിലേക്ക് തെറ്റായ ഇടത്തേക്കും ഒരു കുട്ടിയും പതിച്ച് പോവരുത്. അതിന് കുട്ടികള്ക്ക് മികച്ച പങ്കാളിത്ത ഇടങ്ങള് ഒരുക്കണം. ലൈബ്രറിയെ കുട്ടികളുടെ ഏറ്റവും മികച്ച പങ്കാളിത്ത ഇടമാക്കാനുള്ള പ്രവര്ത്തനങ്ങളില് ഒരു ചുവട് കൂടി മുന്നോട്ട് പോയിരിക്കുന്നു ഞങ്ങള്. ഈ ദിവസം അവിസ്മരണീയമാക്കിയ എല്ലാ കൂട്ടുകാര്ക്കും നന്ദി. ഒപ്പം കേരള സംസ്ഥാന ബാലാവകാശ കമ്മീഷന് ചെയര്മാന് അഡ്വ. കെ.വി മനോജ് കുമാര് സാറിനും.