ഉപ്പാപ്പയും ഉമ്മാമയും
അച്ചാച്ചനും അമ്മമ്മയും
അങ്ങനെ പറഞ്ഞുകൊണ്ടേയിരുന്നു. ലോക്ക്ഡൌണ്‍ വീടിന്‍റെ തണലിലിരുന്ന് ഞങ്ങളത് കേള്‍ക്കുകയാണ്, ഒരുപക്ഷേ ആദ്യമായി..
ഫസലുപ്പാപ്പാപ്പയുടെ ചിരി വളപട്ടണം പുഴയിലെ ഓളങ്ങള്‍ പോലെ തോന്നിച്ചു. ഇന്നത്തെ നിറം മങ്ങിയ പുഴയല്ല. തെളിഞ്ഞ വെള്ളവുമായി ഒഴുകിപ്പോയ പഴയ കാലത്തിന്‍റെ പുഴ. റസിന്‍ നവാസ് ആ ചിരിയോളങ്ങളുടെ നനവറിഞ്ഞു. എട്ട് ദശകങ്ങള്‍ക്ക് പിന്നിലെ നാട് ആറാം ക്ലാസ്സുകാരന്‍റ മനസ്സിലേക്ക് ഫസലുപ്പാപ്പ വരച്ച് വച്ചു. അന്നത്തെ വളപട്ടണം, തോണികള്‍ തുഴഞ്ഞെത്തുന്ന തോടുകള്‍, ജന നിബിഡമായ അങ്ങാടി, വീട്, സ്കൂള്‍, പള്ളി, വയല്‍,ഇടവഴികള്‍, മരച്ചുവടുകള്‍, നിറങ്ങള്‍ മണങ്ങള്‍, കളികള്‍, അന്നത്തെ പകലുകള്‍, രാത്രികള്‍........ ആദവും, ശിവന്യയും, ഹൈതവും, അഞ്ജിമയും, അനുരാഗും, അമനും, അലനും, ഫല്ലയും, അവന്തികയും...... (കൂട്ടുകാരുടെ എല്ലാ പേരും എഴുതാന്‍ ഈ പേജ് തികയില്ല) അങ്ങനെ നൂറിലധികം കൊച്ചു കൂട്ടുകാര്‍ അവരവരുടെ വീടുകളില്‍ ആഴമേറിയ ഒര്‍മ്മകള്‍ക്ക് ചുറ്റുമിരുന്നു. മനസ്സ് നിറഞ്ഞപ്പോള്‍ പേനയും പേപ്പറുമെടുത്ത് എഴുതാനിരുന്നു. അച്ഛാച്ചന്‍റെ അമ്മമ്മയുടെ ഉപ്പാപ്പയുടെ, ഉമ്മാമ്മയുടെ ....മനസ്സില്‍ പറയാന്‍ തുളുമ്പി നിന്ന എത്രയെത്ര കഥകള്‍. മൊബൈല്‍ ഗെയിമുകളില്‍ നിന്ന് ഒരുപാട് ദൂരെയായിരുന്നു ഞങ്ങളപ്പോള്‍ എന്ന് അതിലൊരാള്‍ കുറിച്ചു. കുട്ടികള്‍ എഴുതുകയാണ് വളപട്ടണം മെമ്മറി പ്രൊജക്ട്. പ്രായമായവരുടെ ഓര്‍മ്മകളോട് ലൈബ്രറിയുടെ കൂട്ടുകാര്‍ കാതുകള്‍ ചേര്‍ത്ത് വച്ചിരിക്കുന്നു. ഇപ്പോള്‍ ഞങ്ങള്‍ക്ക് കേള്‍ക്കാം, ഇത്രനാള്‍ കാണാതെ പോയ വാക്കുകള്‍. ലോക്ക് ഡൌണ്‍കാലത്ത് വളപട്ടണം ജി.പി ലൈബ്രറിയുടെ ക്രിയേറ്റീവ് ഹോമില്‍ കൂട്ടുകാരത് പുസ്തകമാക്കി മാറ്റാന്‍ തയ്യാറായി കഴിഞ്ഞു. ഏഴ് ഓര്‍മ്മ പുസ്തകങ്ങളുടെ ആദ്യഭാഗം ക്രിയേറ്റീവ് ഹോമില്‍ അരവതരിപ്പിച്ചു. ഓരോ ടീമും അവരുടെ പുസ്തകത്തിന് പേരുകളിട്ടു. അവ കാണാനും അവരോട് മിണ്ടാനുമായി പ്രിയപ്പെട്ട എഴുത്തുകാരന്‍ കെ.ടി ബാബുരാജും എത്തി. വളപട്ടണത്ത് ഭൂതകാലത്തിന്‍റെ വേരുകളുള്ള, കുട്ടികളുടെ പ്രിയപ്പെട്ട ബാബുരാജങ്കിള്‍.https://soundcloud.com/user-185230033/1-kt-baburaj-valapattanam-gp-librarys-creative-home
--------------------------------------------------------------------------------------------------------------------------
യശോദമ്മയുടെ മുമ്പിലിരുന്ന് പഴയ കാലം കേള്‍ക്കുകയായിരുന്നു ദിയ. എത്ര കഥകള്‍. കേള്‍ക്കാത്ത വാക്കുകള്‍. താഹയങ്കിള്‍ (താഹ മാടായി) കഴിഞ്ഞ ദിവസം പറഞ്ഞ കാര്യങ്ങള്‍ ദിയ അപ്പോള്‍ ഓര്‍ത്തു. കൊച്ചു കൊച്ചു കാര്യങ്ങളില്‍ പോലുമുണ്ടാകും മാഞ്ഞു പോവാത്ത ഓര്‍മ്മയുടെ സ്പര്ശങ്ങള്‍. അമ്മമ്മയുടെ ഒരു കാതിലയില്‍, ഒരു വളയില്‍... അങ്ങനെ.
വളപട്ടണം ഗ്രാമപഞ്ചായത്ത് ലൈബ്രറി കോവിഡ് -ലോക്ക്ഡൌണ്‍ കാലത്ത്, കുട്ടികള്‍ക്കായി തുടങ്ങിയ ക്രിയേറ്റീവ് ഹോം പ്രവര്‍ത്തനങ്ങളുടെ ഭാഗമാണ് വളപട്ടണം മെമ്മറി പ്രൊജക്ട്. വീട്ടിലെ മുതിര്‍ന്ന ആളുകളുടെ ഓര്‍മ്മകളെ കേള്‍ക്കുകയും അവയില്‍ കൂട്ടുകാര്‍ക്ക് ഏറ്റവും പ്രിയപ്പെട്ടവ എഴുതിത്തയ്യാറാക്കുകയും ചെയ്യുന്നു. ഓരോ ടീമിലും പതിനഞ്ചും ഇരുപതും ഓര്‍മ്മക്കുറിപ്പുകള്‍ തയ്യാറായി കഴിഞ്ഞു. അവയെല്ലാം ചേര്‍ത്താല്‍ ഓരോ ടീമിനും ഒരു കൊച്ച് ഓര്‍മ്മ പുസ്തകമാകും. അങ്ങനെ ഏഴ് ഓര്‍മ്മ പുസ്തകങ്ങള്‍. ഏഴും ചേര്‍ന്നാലോ, വളപട്ടണത്തിന്‍റെ കിടിലന്‍ ഒരു മെമ്മറി ബുക്ക്.
അവരുടെ ആദ്യ സൃഷ്ടികളെ വിലയിരുത്താനെത്തിയ കെ.ടി ബാബുരാജങ്കിള്‍ രണ്ട് മണിക്കൂറിലധികം അവരോടൊന്നിച്ച് ചെലവഴിച്ചു. https://soundcloud.com/user-185230033/2-kt-baburaj
പ്രാഥമിക റൌണ്ടാണ് കഴിഞ്ഞത്. പ്രശസ്ത ഡിസൈനര്‍ സൈനുല്‍ ആബിദ് കുട്ടികള്‍ക്ക് ഈ റൌണ്ടില്‍ നിര്‍ദ്ദേശവുമായി എത്തുന്നുണ്ട്. കൂടുതല്‍ പഠനത്തിന്‍റെ പിന്‍ബലത്തില്‍ മികച്ച എഡിറ്റര്‍മാരുകൂടിയാവുകയാണ് വളപട്ടണം ലൈബ്രറിയുടെ കൂട്ടുകാര്‍. അങ്ങനെ ലോക്ക്ഡൌണില്‍ അനേക ദശകങ്ങളുടെ ആഴങ്ങളില്‍ വേരാഴ്ത്തി നില്‍ക്കുന്ന, ഒരു ചരിത്ര നിര്‍മ്മിതി തയ്യാറാവുകയാണ് വളപട്ടണം പുഴയോരത്ത്.
ബിനോയ്
ലൈബ്രേറിയന്‍
9495396517
No comments:
Post a Comment